4. 3. 2023: Вмер Іван Бровді, автор скулптуркы про Премію Александра  Духновіча

Як інформовала Мукачовска містьска рада на своїм офіціанім сайтї на сітї Facebook, 2-го марца 2023-го року у віцї 83 років вмер Іван Бровді, скулптор і малярь русиньского походжіня, ку чом він і голосив ся.

Бровді быв честным жытелём Мукачова, лавреатом умелецькой Премії Александра Духновіча, мав званя Народного умелця Україны і быв членом Народного общества художників Україны.

Може найвеце познатым є ёго памятник святых Кіріла і Методія, котрый у 2000-ім роцї одкрыли в центрї Мукачова, но Іван Бровді зробив веце творів з русиньсков тематіков, а нелем.

Народив ся Іван Бровді 2-го юна 1939-го року в селї Онок на Підкарпатьскій Руси. Середню школу абсоловав у Великых Комятах, пак учів ся на умелецькім учілищу в Ужгородї, котре закінчів у 1961-ім роцї.

Одвтогды створив велике чісло монументалных робот, бронзовых і деревяных рельєфів. Много з них є повязаных з русиньсков історіёв і културов. В роцї 1986 зробив серію басрельєфів з назвов Історія Мукачова.

Ёго бронзовый памятник святых Кіріла і Мефодія, учітелїв Славянів, став вже єдным із емблемів центра Мукачова. Меджі ёго найвызначнїшы творы належыть і памятник, котрый є у Києво-Печерьскій лаврї.

Бровді быв і малярём, занимав ся зображінём народного жывота, быв майстром автопортретів. Інтересным чудом у Бровдія є і продовжованя русиньской Підкарпатьской малярьской школы. Своїм способом ожывив манайловского духа епічного і фантастічного Підкарпатя.

Од 1997-го року Карпаторусиньскый научный центер в Споєных штатах Америкы уділёвав Премію Александра Духновіча за русиньску літературу, як і за вызначне дїло про Русинів. В рамках премії лавреат діставав і бронзову скулптуру русиньского медведя – такзваного русиснького оскара. Іван Бровді є автором того русиньского „оскара‟.

За свої умелецькы успіхы быв нагородженый і Преміёв Адалберта Ерделія і Йосифа Бокшая, а то аж трираз, в роках 1998, 2001 і 2011.

Kреатівна довговікость Івана Бровдія была інтересна. Выстава ёго образів у 2013-ім роцї в просотрах умелецького музея Йосифа Бокшая была повна фарев і творчой енерґії. Скоро вшыкты фаховцї згодли ся на тім, же Іван Бровді досягнув внутрїшнє ослободжіня, вкрочів до щастного рітму мальбы, в котрім робить ся вшытко з дяков і потішіньом.

Персоналны выставы своїх творів мав окрем Підкарпатя, де выставлёвав найвеце, і в Румунії, Мадярьску ці на Словакії. У 2015-ім роцї выставлёвав у Музею сучасного уменя в Києві.

Роботы Івана Бровдія находять ся в Народнім художнім музею Україны, Закарпатьскім художнім музею імени Йосифа Бокшая, Закарпатьскім краєзнавчім музею, Закарпатськім музею архітектуры і бываня, в Києво-Печерьскій лаврї, як і в пріватных колекціях на Українї, в Росії, Ізраілю, США, Канаді, Німецьку, Італії, Австрії, Мадярьску, на Словакії, в Польщі і Австралії.

Петро МЕДВІДЬ, ЛЕМ.фм. Ґрафічна і языкова коректура: АРК в СР.